Ի՞նչ փոխեցին սոցիալական ցանցերը մեր աշխարհում

0

Image Blog

Դեռ «երեկ» էր, որ հեռահար շփման արագ ու ամենահարմար միջոց էր համարվում հեռախոսը: 19-րդ դարի կեսերին արված մի շարք հայտնագործությունների արդյունքում մարդկային ստեղծագործ միտքը քաղաքակրթությանը պարգևեց Հեռախոսը, կամ, ինչպես ստեղծողներից մեկը` գերմ. ֆիզիկոս և գյուտարար Ֆիլիպ Ռեյսն անվանեց, «Telephon»-ը: Գրեթե մեկ դար հետո արդեն ի հայտ եկան բջջային հեռախոսները:

Ձայնազանգերը կամաց-կամաց լրացվեցին տեսազանգերով, կարճ հաղորդագրությունների արագ փոխանցման համակարգերով: Լայնորեն սկսեցին օգտագործվել այնպիսի հաղորդակցման սարքեր, ինչպիսին, օրինակ, Pager-ն է, հաղորդակցման համակարգեր, ինչպիսին Skype-ն է և այլն: Իսկ 21-րդ դարն, ի թիվս բազմաթիվ ձեռքբերումների, նշանակավորվեց նաև սոցիալական ցանցերի ստեղծմամբ: Վերջին տասնամյակում անհնար է ժամանակակից մարդու կյանքը պատկերացնել առանց սոցիալական ցանցերի:

Այսօր սոցիալական մամուլը ոչ միայն առանցքային տեղ է գրավում ժամանակակից մարդու ապրելակերպում, այլև դարձել է օգտակար մարքեթինգային գործիք ցանկացած տեսակի ձեռնարկատիրական գործունեության համար: 21-րդ դարի երեխաներին ապշեցնում է այն փաստը, որ հեռախոսներն ընդամենը մի քանի տարի առաջ օգտագործվում էին միայն զրույցների համար: Նրանք զարմանում են՝ իմանալով, որ մենք նույնիսկ չէինք կրում հեռախոսները մեզ հետ 15-20 տարի առաջ:

Սա խոսում է այն մասին, որ ամեն ինչ պաշտոնապես և մշտապես փոխվել է: Հասունանում է երեխաների մի սերունդ որը չի կարողանում նույնիսկ պատկերացնել աշխարհն առանց Smart-հեռախոսների և սոցիալական ցանցերի: Այդ ամենն արդեն պաշտոնապես ներդրված է մեր մշակույթի մեջ:

Image Blog

2005-ին, երբ Facebook-ն աշխարհով մեկ տարածման վաղ փուլերում էր դեռ, շատերը, նույնիսկ նրանք, ովքեր արդեն գրանցվել էին Facebook սոցիալական կայքում, ոչ մի իմաստ չէին գտնում դրանում: Twitter-ն ի հայտ եկավ գրեթե նույն ժամանակ: Այդ ժամանակ, սակայն, շատերը դրանում տեսան լոկ անիմաստ խաղալիք: LinkedIn-ն ըստ էության էլեկտրոնային ռեզյումե էր: Google+ -ը մինչև 2011թ. նույնիսկ չէր էլ նախագծվել: Հետո արդեն հաջորդեցին Pinterest-ը և այլ հարթակներ:

Image Blog

Այսօր միլիոնավոր մարդիկ ամեն օր իրենց օրն սկսում են սոցիալական կայքեր անցելելով: Ի՞նչ են տվել և տալիս ժամանակակից մարդուն սոցիալական ցանցերը:

Image Blog

Սոցիալական ցանցերի դրական կողմերից է ինֆորմացիայի արագ հասանելիությունը: Այն հարցին, թե ինչու եք այցելում սոցիալական ցանցեր, հարցվածների մեծամասնությունը պատասխանում է` ինֆորմացիայի համար: Բազմաթիվ օգտատերեր լուրերի առօրյա պաշարը ստանում են հենց սոցիալական ցանցերից: Սոցիալական ցանցերի միջոցով մշտապես տեղակացված են լինում ընկերների կյանքում ընթացող փոփոխություններին և նորություններին: Տեղադրված հայտարարությունները շատ արագ տարածում են ստանում: Մյուս դրական հատկանիշը համատարած կապվածությունն է մեկմեկու: Եթե հեռախոսային շփման պարագայում հաճախ դժվարություններ են առաջանում զբաղվածության, տանը կամ աշխատատեղում չլինելու պատճառով, ապա սոցիալական ցանցերի միջոցով միշտ կարելի է թողնել հաղորդակցություն, մեկնաբանություն ու փոխանցել պահանջված ինֆորմացիան: Սոցիալական ցանցերը, անկախ ամեն ինչից, ժամանակակից մարդուն տալիս են գլոբալացված լսարան: Տարիներ առաջ հոդվածները, գրվածքները և պատմություններն ընթերցողին հասցնելը բավական դժվարություններ էին պարունակում` խմբագրին տրամադրելու, հրատարակման հետ կապված ծախսերի և այլնի հետ կապված, ապա այսօր հարցը լուծվում է ընդամենը սեփական համակարգչի վրա նյութը հավաքելով և ինտերնետ հասանելոիության պայմաններում սոցիալական ցանցերում այն տարածելով: Շատ արագ բազմաթիվ ընթերցողներ ծանոթանում, հավանում, կամ քննադատում են տեղադրված նյութերը ու իրենց հերթին դրանք տարածում այս կամ այն եղանակով: Չմոռանանք որպես դրական հատկանիր նշել նաև Twitter-ում լայնորեն օգտագործվող Hashtag-երի արդյունավետությունը: Hashtag-երը հեշտացնում են տեղեկատվության փնտրտուքները և ուղղորդում անհրաժեշտ տեղեկատվության կողմը: Սոցիալական ցանցերն առավել հարմար պայմաններ են ստեղծում բիզնեսի համար: Ցանկացած ձեռնարկատեր օգտվում է անվճար գովազդի հնարավորությունից սոցիալական ցանցերում: Յուրաքանչյուր արտադրող գովազդում է իր արտադրանքը ընկերների և ծանոթների էջերում տեղադրելով: Հայտնի ապրանքանիշերը մեծացնում են երկրպագուների բանակները պաշտոնական էջերում ցուցադրություններ և գովազդային հոլավակներ տեղադրելով: Եթե տարիներ առաջ ուղղակի երազանք էր առանց ներկա գտնվելու ականատեսը լինել մեքենաների կամ հագուստների հայտնի բրենդների ցուցադրություններին, ապա դա այսօր հասանելի է YouTube-ի և այլ կայքերի միջոցով:

Քիչ չեն նաև սոցիալական ցանցերի բացասական կողմերը: Այսօր միլիոնավոր մարդկանց համակած և դարի հիվանդություն դարձած Selfie-ամոլությունը ոչ այլ ինչ է, եթե ոչ նարցիսիզմով տարվածություն: Հայելու դիմաց արված կիսամերկ ու աղջիկների duck face Selfie-ները սեփական անձը անտեղի կարևորելու, և երբեմն, ինչու ոչ, որոշակի բարդույթներ քողարկելու ոչ լավ դրսևորումներ են: Գեղատեսիլ վայրերում, պատմական տեղերում լինելը, հետաքրքիր մարդկանց հետ կողք-կողքի գտնվելը ցուցադրելու համար ամենևին պարտադիր չէ սոցիալական ցանցերում յուրաքանչյուր ժամ ու րոպե Selfie տեղադրել: Այդ ամենը շատ հեշտորեն կարելի է անել նաև սովորական նկարների միջոցով:Չափազանց վտանգավոր են դարձել սոցիալական ցանցերի միջոցով տարածվող քաղաքական, կրոնական ջատագովական ճառերը: Բազմաթիվ վերլուծաբաններ «արաբական գարունը» և «գունավոր հեղափոխությունները» կապում են հենց այդ երևույթի հետ: Եթե տարիներ առաջ քաղաքական գործիչներից համապատասխան հռետորական պատրաստվածություն և ջանքեր էին պահանջվում իրենց մտքերն ու նպատակները տարածելու համար, ապա այսօր մեկի գրած «գեղեցիկ» ճառը հաջողությամբ տարածում և թիրախային խմբերին են հասցնում բազմաթիվ անհատներ: Սոցիալական ցանցերի միջոցով քաղաքական ու կրոնական հաղորդագրությունների տարածման սահմաններն այսօր անհամեմատելի են «կենդանի» ճառերի տարածման սահմանների հետ: Մեր դարաշրջանի արագ հասանելի մասսայականությունն այսօր ամենազորեղ զենքն է դարձել բազմապիսի հեղափոխությունների համար: Նշված երկրորդ բացասական կողմից սահում բխում է երրորդը, դա է` անանության քողի տակ թաքնվելը: Fake էջերն ու անանուն պրոֆիլները սադրիչների և թուլամորթների հիմնական գործիքներն են: Սեփական անունով արտահայտվելու անկարողությունն ու վախը ոմանց ստիպում են հանդես գալ այլ մարդկանց կամ ուղղակի հորինված անունների ներքո: Սոցիալական ցանցերի ոչ գովելի հատկութոյւններից է նաև այն, որ մարդիկ այստեղ ավելի շատ խոսում են, քան գործում: Բազմապիսի հնչեղ խոսքերին չեն հաջորդում համապատասխան գործողություններ: Հնչեցրած ու տարածած մտքերը կորցնում են իրենց արժեքը խոսքից-գործ չդառնալով: Մեկ այլ բացասական կողմն էլ տգիտության հեշտորեն տարածումն է: Չճշտված, չխմբագրված նյութերը կարդում են միլիոնավոր մարդիկ, որոնցից եթե ոչ բոլորը, ապա գոնե քիչ տեղեկացվածների մի մասը ընկալում և օգտագործվում է անգրագետ, կիսագրագետ ու մոլորեցնող ինֆորմացիան:

Image Blog

Ամփոփելով նշենք, որ, ինչևէ, սոցիալական ցանցերը մեր առօրյան են դարձել և գրավել են մարդկային շփումների ու հաղորդակցության ոլորտի մեծ մասը: Սակայն, ժամանակակից մարդու զբաղվածության պայմաններում որքան էլ կարևորենք սոցալական կայքերի դերն ու նշանակությունը, այնուամենայնիվ չպետք է թույլ տալ, որ դրանք ամբողջավին խժռեն «կենդանի» շփումներն ու կապերը: Ձեռքսեղմումն ու գրկախառնությունը, ձայնի երանգն ու շեշտադրումներն անփոխարինելի են մարդկային արդյունավետ հաղորդակցության ու հասկացման համար, իսկ սոցիալական ցանցերը թող ոչ թե «կյանք» դառնան, այլ մնան լոկ «գործիքներ»:

Image BlogImage Blog

Share.