Apple-ը պատրաստվում է ճկուն էկրանով iPhone թողարկել

0

Երկար ժամանակ է, ինչ համացանցում պտտվում էին լուրեր այն մասին, որ Samsung ընկերությունը պատրաստվում է ծալվող սմարթֆոն թողարկել: Սակայն օրեր առաջ հայտնի է դարձել, որ այս գաղափարը միայն Samsung-ին չի պատկանում և միայն Samsung-ը չէ, որ աշխատանքներ է տանում ճկուն սմարթֆոն ստեղծելու ուղղությամբ: Պարզվում է, որ ծալվող սմարթֆոն ստեղծելու ցանկություն ունի նաև Samsung ընկերության գլխավոր մրցակից և հակառակորդ՝ Apple-ը:

Այսպիսով, ամերիկյան Apple կորպորացիան նույնպես ձեռնամուխ է եղել ճկուն էկրանով iPhone մշակել։

Արդեն իսկ iPhone X սմարթֆոնի մոդելում ընկերությունը օգտագործել է ճկուն OLED էկրան։ Ինչպես գիտեք, ներկայումս Samsung-ը հանդիսանում է OLED-էկրանների բացառիկ մատակարարը Apple-ի iPhone-երի համար: Սակայն այս անգամ ամեն ինչ այլ է, քանի որ Apple-ը, իր մրցակցից կախվածությունը նվազեցնելու նպատակով, չի պատրաստվում օգտվել որևէ այլ ընկերության արտադրած էկրաններից, այլև ցանկանում է մշակել իր սեփականը։

Այնպես որ, ամենայն հավանականությամբ, սարքը հագեցած կլինի Apple-ի սեփական microLED էկրանով, քանի որ վերջերս հայտնի է դարձավ, որ ընկերությունը աշխատում է սեփական էկրան ստեղծելու ուղղությամբ: Այս նոր էկրանի գլխավոր առանձնահատկությունն այն է, որ վերջինս աշխատանքի ընթացքում լուսավորության կարիք չունի: Յուրաքանչյուր փիքսել ինքնին կարող է հաղորդել լույս։

Շատ հնարավոր է, որ նոր iPhone-ը կարողանա փոխարինել նույնիսկ ներկայիս iPad-ներին:

Ըստ փորձագետ Վամսի Մոհանի՝ Apple ընկերությունը կկարողանա ծալվող էկրանով սմարթֆոնների արտադրությունը գործարկել միայն 2020 թվականին։ Եվ եթե Apple-ին, իսկապես, հաջողվի ծալվող էկրանով iPhone թողարկել, ապա դա իրական հեղափոխություն կառաջացնի սմարթֆոնների և բջջային սարքերի ողջ շուկայում: Այնպես որ, մեզ մնում է միայն համբերություն հավաքել և սպասել։

Նշենք, նաև LG ընկերությունը նույնպես աշխատում է ծալվող սմարթֆոն ստեղծելու ուղղությամբ։ Ընկերությունը արդեն իսկ արտոնագրել է իր ստեղծած նորարարությունը՝ ծալվող էկրանը:

Apple-Files-Patent-For-Foldable-iPhone

Share.