Apple-ը վերջին 4 տարվա ընթացքում առաջին անգամ նոր iPod է ներկայացրել։

0

 

Ամերիկյան Apple կորպորացիան երկար դադարից հետո ներկայացրել է iPod touch՝ 7-րդ սերնդի նոր շարժական նվագարկիչը, որը պահպանել է նախորդ մոդելների դիզայնը, սակայն զգալիորեն բարելավել տեխնիկական բնութագիրը:

Նշենք, որ Apple-ը վերջին 4 տարիրների ընթացքում չի թողարկել ոչ մի iPod։ Վերջին անգամ ընկերությունը ներկայացրել էր iPod 2015 թվականին։

Ընկերության պաշտոնական կայքում նշվում է, որ նոր iPod touch-ն այժմ աշխատում է ժամանակակից SoC A10 Fusion պրոցեսորով։ Վերջինս առաջին անգամ ցուցադրվել էր 2016 թվականին iPhone 7 և 7 Plus սմարթֆոններում, և կոչված է մատուցել առավել բարձր արդյունավետություն և կատարում:

«Մենք ստեղծել ենք ամենահասանելի iOS սարքավորումը, որը 2 անգամ ավելի բարձր արտադրողականություն ունի, քան նախկինում: Նոր iPod Touch-ի ուլտրաբարակ դիզայնը և թեթև քաշը պարզապես իդեալական է խաղեր խաղալու և երաժշտություն վայելելու համար, անկախ նրանից, թե որտեղ եք գտնվում»,- նշում է Apple-ի մարքեթինգի բաժնի փոխնախագահ Գրեգ Յոսվիակը։

Սարքը հագեցած է 4 դյույմանոց էկրանով և, չնայած, դիսփլեյի բավականին մեծ չափսին, ընկերությունը որոշել է չհրաժարվել «դասական» դարձած մեխանիկական Home գլխավոր կոճակից՝ պահպանել նախկին դիզայնը։

Բացի հզոր պրոցեսորից, նոր iPod Touch-ը համալրված է մինչև 256 GB ծավալով ներքին հիշողությամբ։

Նվագարկիչը ունի ալյումինե կաղապար, իսկ հետևի հատվածում տեղադրված է միակ՝ հիմնական տեսախցիկը:

Բացի այդ, նոր iPod touch-ը հնարավորություն է տալիս խմբակային զանգեր կատարել՝ օգտագործելով FaceTime տեխնոլոգիան:

Սակայն հարկ ենք համարում նշել, որ նորույթը չի համալրվել ո՛չ Touch ID, ո՛չ էլ Face ID տեխնոլոգիայով։

Նոր սերնդի iPod Touch-ը հասանելի է գնորդին մի շարք գունային լուծումներով՝ կարմիր, վարդագույն, ոսկեգույն, կապույտ և արծաթագույն։

Հայտնի է, որ նորագույն գաջեթի մեկնարկային գինը կկազմի մատավորապես 199 դոլար:

Share.