Facebook, WhatsApp և Instagram հավելվածների նախնական տեղադրումը Huawei սմարթֆոններում կարգելվի։

0

 

Facebook ընկերությունը այլևս թույլ չի տա Huawei-ին իր նոր սմարթֆոններում օգտագործել Facebook Inc-ն պատկանող հավելվածները, այս մասին հայտնում է Reuters-ը։

Խոսքը գնում է Facebook App-ի, WhatsApp-ի և Instagram-ի մասին։

Ըստ այս տեղեկատվության՝ օգտատերերը, որոնք ներկայումս օգտագործում են Huawei-ի սմարթֆոնները` վերոնշյալ հավելվածներով, կարող են շարունակել օգտագործել դրանք և ստանալ թարմացումներ, սակայն սմարթֆոնների նոր տարբերակներում դրանք ներառված չեն լինի։

Միանշանակ կարելի է ասել, որ Facebook սոցցանցի նման որոշումը թուլացնում է Huawei Technologies-ի վաճառքի հեռանկարները։

Ինչպես հայտի է, Huawei ընկերության համար եկամտի ամենամեծ աղբյուրը անցած տարի հանդիսացել է հենց սմարթֆոնների բիզնեսը՝ շնորհիվ Եվրոպայում և Ասիայում դրանց պահանջարքի ակտիվ աճի։

Facebook-ի այս քայլը կապված է ԱՄՆ իշխանությունների՝ մայիսի 17-ին կայացրած որոշման հետ, ըստ որի, Huawei-ը ներառվել էր սև ցուցակում։ ԱՄՆ կառավարությունը մեկնաբանում է արգելափակման պատճառը, նշելով, որ ըստ իրենց ունեցած տեղեկությունների, ԱՄՆ-ի տարածքում Huawei-ի ազատ գործունեությունը սպառնում է ինչպես երկրի ազգային անվտանգությանը, այնպես էլ արտաքին քաղաքական շահերին:

Հիշեցնենք, որ ավելի վաղ տեխնելոգիական ոլորտի հսկա Google-ը տեղեկացրել էր, որ այլևս չի տրամադրի իրեն պատկանող Android ծրագրային ապահովումը Huawei հեռախոսների համար։

Սակայն նշել է, որ Google PlayStore-ը և Google-ի բոլոր հավելվածները նախկինի պես հասանելի կլինեն Huawei հեռախոսների ընթացիկ մոդելների համար։

Google-ից բացի Huawei հետ համագործակցության դադարի մասին են հայտնել նաև մի շարք խոշոը տեխնոլոգիական ընկերություններ, ինչպես օրինակ՝ ARM-ը, Broadcom-ը, Intel-ը, Microsoft-ը, Qualcomm-ը և այլն։

 

Share.