Google-ի, Amazon-ի, Facebook-ի ղեկավարները կժամանեն Հայաստան` մասնակցելու «ՏՏ համաշխարհային համաժողով»-ին։

0

2019 թվականի հոկտեմբերի 6-9-ը ընկած ժամանակահատվածում Երևանում տեղի կունենա ՏՏ համաշխարհային կոնգրեսը, որին իր մասնակցությունն արդեն հաստատել են այնպիսի առաջատար ընկերությունների ղեկավարները, ինչպիսիք են Google-ը, Amazon-ը, Facebook-ը։

Այս մասին հայտարարել է ՀՀ փոխվարչապետ Մհեր Գրիգորյանը՝ Ղազախստանում ընթացող «Թվային օրակարգը գլոբալիզացիայի դարաշրջանում. Եվրասիական նորարարական էկոհամակարգ» համաժովի շրջանակներում:

«Հոկտեմբերի 6-9-ը Երևանում կկայանա «Տեղեկատվական տեխնոլոգիաների համաշխարհային համաժողովը»: Կլինեն Google-ի, Amazon-ի և Facebook-ի և այլ ընկերությունների ղեկավարություններ: Կարծում եմ, որ դա հետաքրքիր հարթակ կլինի մեր հերթական հանդիպման համար, – նշում է ՀՀ փոխվարչապետ Մհեր Գրիգորյանը:

Համաժողովի գլխավոր նպատակը համատեղ միջոցներ մշակելն է, որոնք կխթանեն Եվրասիական տնտեսական միության երկրների թվային տնտեսությունների զարգացումը` բարձրացնելով նրանց մրցունակությունը:

Իր ելույթում փոխվարչապետը նաև անդրադարձել է առաջիկայում Երևանում մեկնարկող Ինժեներական քաղաքի կառուցմանը, որը կնպաստի նորարարական գաղափարների մշակմանն ու դրանց ներդրմանը ոչ միայն տեղական շուկայում, այլև Հայաստանի սահմաններից դուրս:

Նշենք, որ այս Համաժողովը տեղեկատվական տեխնոլոգիաների ոլորտի միջազգային խոշոր միջոցառում է, որն իր շուրջն է համախմբում ՏՏ ոլորտի տարբեր երկրների բարձրաստիճան պաշտոնյաներին, վերազգային կազմակերպությունների, համալսարանների և գիտահետազոտական կենտրոնների ղեկավարներին, հասարակական կառույցների ներկայացուցիչներին:


«ՏՏ համաշխարհային համաժողով»-ը անցկացվում է 1978 թվականից երկու տարին մեկ անգամ:

Share.