Huawei-ն ներկայացրել է Face ID համակարգ, որը գերազանցում է Apple-ին։

0

iPhone X-ը այս տարի դարձավ ամենաշատ աղմուկ բարձրացրած սմարթֆոններից մեկը շնորհիվ իր նոր դիզայնի և մի շարք նոր առանձնահատկությունների, որոնց թվում էր օրինակ Face ID-ն: Իհարկե նորություն չէ, որ հաճախ այլ ընկերություններ փորձում են կրկնօրինակել iPhone-ի առանձնահատկությունները։ Այնպես որ այս անգամը նույնպես բացառություն չէ։

Օրեր առաջ Huawei ընկերությունը՝ Չինաստանում կայացած Honor V10 սմարթֆոնի շնորհանդեսի ընթացքում սպասված սմարթֆոնից բացի ներկայացրել է նաև մի նոր տեխնոլոգիա, որը նույնիսկ գերազանցում է Apple-ի կողմից ստեղծված Face ID-ն և թույլ տալիս ավելի իրական Animoji-ներ ստանալ։

Huawei-ի ընկերության կողմից մշակված դիմագծերի նույնականացման համակարգը աշխատում է ճիշտ նույն սկզբունքով, ինչ iPhone X-ում ներկառուցված Face ID–ին։ Այնպես որ կասկածներ չկան, որ գաղափարը վերցված է Apple-ից։ Սակայն ինչպես պնդում է չինական ընկերությունը, իրենք փորձել են ստանալ ավելի բարձր որակ, և կարծես թե, դա նրանց հաջողվել է։

Սմարթֆոնի դիմային հատվածում տեղադրված սկաները ստեղծում է օգտատիրոջ դեմքի եռաչափ մոդելը՝ ֆիքսելով 300 հազար անտեսանելի կետ, որը տասն անգամ ավելի շատ է, քան iPhone X-ում։ Նշենք նաև, որ դեմքի 3D  մոդելի ճշգրիտ ստեղծման համար պահանջվում է 10 վայրկյան, իսկ նույնականացման համար՝ 0,4 վայրկայն։ Բացի այդ դեմքի մանրակրկիտ սկանավորումը թույլ է տալիս նաև ավելի ճշգրիտ կարդալ դեմքի միմիկանները և շարժումները, ինչի արդյունքում էլ հնարավոր է դարձել բարելավել կենդանի էմոջիներ (Animoji) ստեղծելու ֆունկցիան։ Այնպես որ այս հարցում Huawei ընկերությունը նույնպես փորձել է առաջ անցնել Apple-ից։

Ցավոք, Huawei ընկերության կողմից մշակած դեմքի ճանաչման համակարգը դեռևս ոչ մի սմարթֆոնում կամ սարքում առկա չէ։ Ամենայն հավանականությամբ, այն կթողարկվի հաջորդ տարի։

Ավելացնենք, որ սա առաջին անգամը չէ, որ Huawei-ն ցանկացել է գերազանցել Apple-ին: Տարիներ առաջ ընկերությունը ներկայացրել էր «Force Touch» առանձնահատկությունով սմարթֆոն iPhone 6S-ի մեկնարկից ընդամենը մի քանի օր առաջ։

Huwei-Face-ID-002-745x403

Share.