Mercedes-Benz-ի ինքնակառավարվող ավտոբուսը անցել է 20 կմ փորձնական ճանապարհորդությունը

0

Շատ տպավորիչ կլինի փողոցներում ինքնակառավարվող մեքենաներ տեսնելը, երբ դրանք հասանելի դառնան մասսայական կիրառման համար: Ավտոարտադրողները դեռևս աշխատում են software-hardware համադրություններ ստեղծելու վրա, որոնք հնարավոր կդարձնեն առանց վարորդի աշխատող մեքենաները, մինչդեռ իրավաբանները աշխատում են համապատասխան օրենսդրության մշակման վրա:

Հետաքրքիրն այն է, որ խոսքը չի գնում միայն մասնավոր ինքնակառավարվող մեքենաների մասին. աշխարհի տարբեր ծայրերում ներկայումս ընթանում են ինքնակառավարվող ավտոբուսների վրա աշխատող տարբեր նախագծեր:

Սակայն Mercedes-Benz-ին է պատկանում ամենատպավորիչ ինքնակառավարվող ավտոբուսը, որը վերջերս իրականացրել է 20 կմ ճանապարհորդություն Հոլանդիայում, ինչը, միանշանակ, խոշոր առաջընթաց է ոլորտում:

Ավտոբուսը կարողացել է բազմաթիվ խոչընդոտներ հաղթահարել իր ճանապարհին, ինչպես օրինակ՝ քաղաքային շրջաններում երթևեկելը, թունելներով անցնելը, ճանապարհատրանսպորտային նշաններին հետևելը և ասֆալտի անհարթություններից խուսափելը: Վերջին ֆունկցիան իրականացվել է անընդմեջ հսկող կամերայի միջոցով, որը նկարում և համեմատում է ասֆալտը նախկին երթևեկությունների հետ, որպեսզի հայտնաբերի և ֆիքսի առկա տարբերությունները:

Ավտոբուսը նաև ինքնուրույն կառավարում է իր կանգառները: Այն նավիգացիայի միջոցով հայտնաբերում է դրանք և կարողանում է կանգնել մայթից 5 սմ հեռավորության վրա:

«Ապագայի» ավտոբուսը կարողանում է ընթանալ մինչև 70 կմ/ժ արագությամբ, ինչը բավականին լավ ցուցանիշ է, և հաղորդակցվում է լուսաֆորների հետ՝ հասկանալով, թե երբ պիտի փոխվի լույսը:

Վերջապես, ինտերյերը ևս հարմարեցված է, որպեսզի ուղևորները կարողանան ունենալ առավելագույնս հաճելի երթևեկություն: Ավտոբուսներն ունեն երեք առանձին զոնաներ՝ կախված ուղևորի երթևեկության տևողությունից:

Ներկայացված վիդեոյում կարող եք տեսնել ավտոբուսի մասին Mercedes-Benz-ի կողմից տրամադրված հետաքրքիր մանրամասները:

Share.