Microsoft-ի նոր HoloLens 2 ակնոցները հասարակ օգտատերերի համար չեն։

0

MWC 2019 ցուցահանդեսի շրջանակներում Microsoft կորպորացիան ներկայացրել է նոր սերնդի HoloLens 2՝ լրացուցիչ իրականություն ակնոցը, որը պետք է մրցի Magic Leap One-ի հետ։

Ինչպես պնդում է ընկերությունը, ի տարբերություն նախորդ սերնդի նորույթը պետք է լինի ավելի հարմարավետ և որակյալ։

Ներկառուցված հատուկ չիպի միջոցով ակնոցը կարող է հոլոգրաֆիկ պատկերներ դնել իրական օբյեկտների վրա։ Հոլոգրաֆիկ պատկերների հետ փոխգործակցությունը թույլ է տալիս խաղալ տեսախաղեր, ստեղծել 3D-մոդելներ, անցկացնել տեսազրույցներ և այլն:

HoloLens 2-ի տեսանելիության դաշտը 57 աստիճան է, ինչը առաջին մոդելից մոտավորապես կրկնակի անգամ ավելի շատ է։

Microsoft-ը սարքի տեխնիկական բնութագրի մասին շատ բան չի հայտնում, սակայն նշում է, որ էկրանի թողունակությունը 2K է։

Բացի այդ սարքավորումը կարող է հետևել աչքի շարժումներին՝ տեսնելով, թե որ կողմն է ուղղված նրա հայացքը՝ վիրտուալ իրականութան դաշտում։

Սարքը հագեցած է նաև Windows Hello անհատականացման տեխնոլոգիայով, հինգ բարձրախոսով, մարտկոցով, Wi-Fi-ով և USB-C միակցիչով։

Սարքը համալրված է նաև գերժամանակակից ToF տեսախցիկով, որն ավելի արագ է և ճշգրիտ։

Microsoft–ի պատկերացմամբ, նորույթը նախատեսված չէ սովորական օգտատերերի համար, իր արտադրանքը պատկերացնում է միայն զինվորականների, բիզնես–ընկերությունների կամ կոնստրուկտորական կազմակերպությունների ձեռքում։

Հիշեցնենք, որ 2018 թվականին Microsoft ընկերությունը 480 մլն դոլար արժողությամբ պայմանագիր է շահել ԱՄՆ-ի բանակի համար լրացված իրականության տեխնոլոգիաներով սարքերի մատակարարման համար:

Բացի դրանից, նոր մոդելը էժան հաճույք չէ։ Ակնոցների շուկայական արժեքը 3500 դոլար է, և, իհարկե, ոչ բոլորն են պատրաստ նման գումար վատնել ակնոցների համար։

Ընկերությունը պլանավորում է թողարկել Hololens 2-ը մինչև այս տարվա վերջ։

 

Share.