Microsoft Surface-ի մասին

0

Վերջերս Microsoft ընկերությունը գնորդների ուշադրությանն է ներկայացրել իր երկար սպասված նորամուծությունը՝ Surface Pro սերնդի 3-րդ արտադրանքը։ Առաջին հայացքից այն հերթական պլանշետ է թվում, սակայն դա միայն առաջին հայացքից, քանի որ երկար սպասցած Surface Pro 3-ը բոլորովին նոր խոսք է գաջեթնրի և հիբրիդների շուկայում։ Եվրոպական պորտալները բազմաթիվ հրապարակումներով են հանդես եկել՝ փորձելով հնարավորինս մանրամասն ներկայացնել այս սարքի բոլոր առանձնահատկությունները։

Առավելությունները

Surface Pro 3-ը գաջեթների շուկային հետևող օգտատերերի ուշադրությունը կգրավի նախ և առաջ նրանով, որ ավելի բարակ ու թեթև է, քան նախորդ երկու տարբերակները: Միևնույն ժամանակ, այն ունի ավելի լայն (12 դյում) դիսփլեյ և դիսփլեյի ավելի բարձր կետայնություն (screen resolution)։ Բացի այդ պլանշետի օգտագործումը զգալի կերպով հեշտանում է ծալովի հենակ-ոտքի շնորհիվ։ Սակայն սա դեռ ամենը չէ։ Այն, ինչով այս նոր թաբլեթն անմիջապես կառանձնանա շուկայում առկա մրցակիցներից, հարակից ստեղնաշարն է և փաթեթի մեջ ներառված թվային գրիչը, որոնք ձեռքի թեթև շարժումով ձեր թաբլեթը կվերածեն ժամանակակից սերնդի նոթբուքերին ոչնչով չզիջող ճկուն ու ոճային լափթոփի։

Չնայած այն բանին, որ ստեղնաշարը չի մտնում սարքի սկզբնական փաթեթի մեջ, և որ այն ունենալու համար հարկավոր է վճարել առանձին, իսկ մի շարք փորձագետներ պնդում են, որ Surface Pro 3-ն այդքան էլ հարմար չէ պահել ձեռքում կամ ծնկներին դրած, ինչպես սովոր են անել նոթբուքի օգտատերերը, մեզ թույլ կտանք պնդել, որ Microsoft-ի նոր արտադրանքը կատարյալ լուծում է շուկայի շատ զգալի սեգմենտը ներկայացնող, այսպես ասած, սպառող և արտադրող հաճախորդների համար: Վերջիններս ոչ միայն օգտվում են տարբեր հավելվածներից, այլև ստեղծում են դրանք, ինչի պատճառով ստիպված են պայուսակում միանգամից երկու սարք կրել։

Միայն պատկերացրեք, թե ինչ հարմարավետ է ունենալ 1 սարք, որով կարող ես ֆիլմ դիտել կամ թվային գրիչով խաչբառ լուծել՝ օգտագործելով այն որպես թաբլեթ, իսկ կարճ ժամանակ անց նույն այդ սարքով հոլովակ պատրաստել կամ ծավալուն տեքստի վրա աշխատել՝ վերածելով այն լափթոփի։

Եթե հաշվի առնենք նաև այն գումարը, որը դուք կտնտեսեք երկու սարքի փոխարեն “երկուսը մեկում” սարք գնելով, ապա կարող ենք վստահ ասել, որ Surface Pro 3-ն իսկական գտածո է ձեզ համար։

Սակայն, եթե դուք մտածում եք մոտ ապագայում այս սարքը ձեռք բերելու մասին, ապա ձեզ հաստատ կհետաքրքրեն նաև Surface Pro 3-ի, ինչպես նաև դրա հարակից սարքերի առավել մանրամասն տեխնիկական տվյալներն ու շուկայում առկա գները։

Ինչպես արդեն նշել ենք, Мicrosoft-ի թողարկած նոր Surface Pro 3-ը այն բացառիկ սարքավորումներից է, որն ի վիճակի է հավասարապես արձագանքել և՛ ստեղծող, արտադրող օգտատերերի, և՛ սպառող օգտատերերի պահանջներին։

Surface Pro 3-ին նախորդած երկու սարքավորումների (Pro և Pro 2), ինչպես նաև հենց Surface Pro 3-ի հիմքում ընկած է թաբլեթի և լափթոթի կիրառումը միավորելու փայլուն գաղափարը, որին նպաստում է Intel Core i շարքը և կցվող ստեղնաշարը, որը մշակված է լափթոփի ստեղնաշարի նմանությամբ։

Գների մասին

64GB SSD հիշողությամբ և Intel Core i3 CPU-ով օժտված Surface Pro 3-ի գինը եվրոպական շուկայում կազմում է մոտ $799 կամ £639։ Այս նյութը պատրաստելու համար դիտարկված Core i5 CPU-ով և 256GB SSD հիշողությամբ տարբերակի գինը եվրոպական շուկայում տատանվում է $1,299-ի կամ £1,109-ի սահմաններում։ Իսկ կցվող ստեղնաշարը, որը կարող եք ձեռք բերել փաթեթից դուրս, մոտավորապես արժե $129 կամ £110, գրում է http://www.cnet.com/-ը։

Չափսերի մասին

Նախորդ երկու Surface Pro մոդելներն ունեն 10.6 դյույմ դիսփլեյ և 13մմ հաստություն՝ 10․8 երկարության և 6․8 լայնության պարագայում։ Նոր՝ 12 դյույմանոց տարբերակի երկարությունը կազմում է 11․5, իսկ լայնությունը 7․9 դյույմ, սակայն սարքի հաստությունը հասցված է 9․1մմ-ի, ինչը բավականին տպավորիչ ցուցանիշ է։ Բացի այդ Pro 3-ն ավելի մեծ է և մի քիչ ծանր, քան նախորդ մոդելները՝ 900գ 800գ-ի փոխարեն։ Հաշվի առնելով ավելի լայն դիսփլեյի առկայությունը, սա կարելի է արժանի ձեռքբերում համարել։

Լուռ հովացուցիչ

Microsoft-ի թիմը բազմիցս հավատացրել է, որ նոր Surface Pro-ի հովացուցիչն այնքան աննկատ է աշխատում, որ կարելի է կասկածել, թե այն ընդհանրապես չկա։ Դրա պատճառը ներքին համակարգի նորամուծություններն են, որոնք մշակվել են Intel-ի հետ համատեղ։ Այդ նոր հատկությունները թույլ են տալիս Core i3 և նույնիսկ Core i7 սարքերին ոչ միայն աշխատել չափազանց ցածր հոսանքի լարմամբ, այլև թեթև ու շատ թույլ հովացուցիչով, որը հիանալի կատարում է իր ֆունկցիան առանց տհաճ և հոգնեցուցիչ աղմուկի կամ ձեռքերին փչող տաք օդի։

Դիսփլեյի մասին

Սարքի դիսփլեյը, որը կարելի է համարձակ կերպով բնութագրել, որպես ավելի քան HD դիսփլեյ, անկյունագծով 12 դյույմ և աշխատում է 2,160×1,440 պիքսել կետայնությամբ։ Դիսփլեյի պատկերը գերազանց տեսանելի է բոլոր անկյուններից։ Բազմաթիվ փորձագետներ համոզված են, որ Surface Pro 3-ն արդեն հասցրել է իր ուրույն տեղը զբաղեցնել այսպես կոչված “better-than-HD displays” (ավելին, քան HD դիսփլեյն է) դասակարգում։

Միացումների, աշխատանքի և մարտկոցի տևականության մասին

Սարքի ողջունելի ձեռքբերումներից մեկը full-size USB 3.0 խցիկն է, որը հաճելի անակնալ է, եթե հաշվի առնենք Surface Pro 3-ի տպավորիչ բարակությունը։ Թաբլեթի վրա նաև կգտնեք microSD քարտի քցիկ, Mini DisplayPort, 5 մեգապիքսելանոց և 1080p HD դիմային և ետնամասային տեսախցիկներ։ Սարքն ունի SSD պահեստի 64GB-ից մինչև 512GB տարբերակներ, ինչպես նաև 4 կամ 8GB հիշողություն, 802.11ac Wi-Fi և TPM 2.0 անվտանգություն։

Surface Pro 3-ը լավ արդյունքներ է ցույց տալիս նաև մարտկոցի տևականության հարցում։ Լիարժեք ծանրաբեռնվածության պայմաններում այն ի վիճակի է ծառայել 7 ժամ և 28 րոպե, ինչը մոտ է լրիվ աշխատանքային օրվա տևողությանը։ Սա 30 րոպեով ավելի է համեմատած Pro 3-ի ամենամոտ մրցակիցներից մեկի՝ Yoga 2 Pro-ի հետ։

Ոճային ու հարմարավետ հենակ

Այս մոդելի աչքի ընկնող առավելություններից մեկը նոր հենակն է, որը կարելի է հարմարացնել 22-150 անկյան տակ։ Սա հատկապես հարմար է դիսփլեյը տեղում ֆիքսելու համար։ Կարծիք կա, որ Surface Pro 3-ը ձեռքում պահելու կամ ծնկներին դնելու ժամանակ որոշակի անհարմարություններ են առաջանում։ Սակայն, խնդիրը լուծվում է, երբ տիրապետում ես սարքից օգտվելու մի քանի պարզ հմտությունների։ Օրինակ, ստեղնաշարի մի փոքր բարձրացումը (ինչպես ցույց է տրված նկարում), այն ավելի հարմարավետ կդառձնի ձեռքի և տեսողության համար (ահա թե ինչու PC սարքերի համար նախատեսված գրեթե բոլոր ստեղնաշարերը փոքրիկ ոտքեր ունեն հակառակ կողմում, որոնց միջոցով վերևի եզրը մի փոքր վեր է բարձրանում)։ Նկատեք, որ ի տարբերություն Surface Pro 3 թաբլեթ-լափթոփի, այս հարմարությունը չունի գրեթե ոչ մի ժամանակակից լափթոփ։

Հարակից սարքեր

Ստեղնաշարը

Surface Pro 3-ի ստեղնաշարն ավելի լայն է, քան նախորդները, որոնք կրկին անթերի աշխատում են, պարզապես ծալված, փակ դիրքում չեն ծածկում ողջ դիսփլեյը։ Սա կարող է աննշան թվալ, բայց թաբլեթի փորձառու օգտատերերը կհաստատեն, որ նուրբ դիսփլեյի պաշտպանիչ ծածկոց ունենալն առաջին անհրաժեշտությունն է սարքի համար։

Ստեղնաշարի ծածկույթի մեջ ներկառուցված թաչփեդը կարող է մի փոքր ետին պլան մղվել զգայուն դիսփլեյի և գրիչի առկայության պայմաններում, սակայն այս գործիքն անշուշտ օգտակար կլինի սարքը որպես լափթոփ օգտագործողների համար։

Գերազանց մշակված ստեղնաշարը, որը նաև կատարում է դիսփլեյի պաշտպանիչ շերտի դեր համարվում է հարակից հավելում։ Չնայած, դժվար է պատկերացնել մեկին, ով կհրաժարվի փոքր ինչ ավել ծախս կատարել և Pro 3-ի հետ միասին ձեռք բերել նաև այս սարքի ամենակարևոր առանձնահատկությունն ապահովող ստեղնաշարը։ Միևնույն ժամանակ անհնար է չխոստովանել, որ $129 կամ £110-ը եվրոպական շուկայում փոքր ինչ թանկ է՝ ստեղնաշար գնելու համար։

Գրիչը

Surface Pro 3-ի հարակից մետաղական Bluetooth գրիչն ունի առանձին մարտկոց և շատ ավելի ամուր է, քան բազմաթիվ այլ Windows 8 թաբլեթներին կցված գրիչները (օրինակ՝ դրա վառ ապացույցն է 8 դյույմանոց Asus VivoTab 8-ի գրիչը)։

Surface Pro գրիչը համապատասխանում է բազմաթիվ հավելվածների, որոնցից է, օրինակ, The New York Times-ի խաչբառերի հավելվածը։ Եթե ճիշտ բեռնեք Microsoft cloud-ի բոլոր ծառայությունները, ապա ձեր OneNote ֆայլերը հասանելի կլինեն ձեր ունեցած բոլոր սարքերով։ Բացի այդ, ֆայլերը հասանելի են նաև միջպլատֆորմային սկզբունքով, այսինքն՝ դրանցից կարելի է օգտվել նաև Android-ով կամ iOS-ով աշխատող սարքավորմամբ կամ լափթոփով (Windows կամ Mac)։

OneNote-ը բացելու համար բավական է մեկ անգամ սեղմել գրիչի վրա առկա կոճակը՝ նույնիսկ այն դեպքում, երբ սարքի դիսփլեյը “քնի” ռեժիմում է։ Իսկ նոթերը պահպանվում են ավտոմատ կերպով, այսինքն՝ տեղեկատվությունը կամ կատարված աշխատանքը կորցնելու վտանգը հասցված է 0-ի։

Surface շարքի դիզայնում կատարված մեկ այլ նշանակալի փոփոխությունն այն է, որ “ետ դառնալ” հրահանգով Windows կոճակը երկար եզրի միջնամասից տեղափոխվել է նեղ եզրի վրա։

Այս փոփոխությունն ունի երկու պատճառ. նախ՝ հարակից ստեղնաշարը փակում է Windows կոճակի նախկին վայրը, երկրորդ՝ կոճակը նեղ եզրի վրա տեղափոխելն օգտատերերին խթանում է սարքը կիրառել ուղղահայաց դիրքով։ Հեղինակը նկատում է, որ ի տարբերություն Apple iPad-ների, որոնք նախ և առաջ ընկալվում են որպես թաբլեթ և կիրառվում են ուղղահայաց, ինչպես գիրքը կամ ամսագիրը, Windows թաբլեթների և հիբրիդների դիզայնը լափթոփ է հիշեցնում՝ գնորդներին մղելով սարքը պահել հորիզոնական, որը կարող է փոքր ինչ անսովոր լինել և վանել։

Սա կապված է Microsoft-ի մտադրության հետ՝ վերածել Surface Pro 3-ը նշումներ կատարելու, նկարելու, գրառումներ անելու համար հարմարավետ սարքի։

Այսպիսով կարող ենք եզրակացնել, որ Microsoft-ը շուկային է ներկայացել գրավիչ առաջարկով, որի գինն ու որակները համաչափ են և մրցունակ։

Սարքն օժտված է 2-ը 1-ում արտադրանքի բոլոր հատկություններով, որոնք են՝ ճկունությունը, ձեռնտու գինը, ինչպես նաև ոճային և հնարամիտ լուծումները։ Եթե դուք փնտրում եք մատչելի, նորաձև ու որակյալ սարք, ապա Surface Pro 3-ը հաստատ ձեզ համար է։

Share.