ՆԱՍԱ-ն պլանավորում է հանքաարդյունաբերություն սկսել Լուսնի վրա

0

ՆԱՍԱ-ն պլանավորում է Լուսնի վրա իրականացնել երբևիցե առաջին հանքաարդյունաբերական միսիան և այժմ կառուցում է դրա համար նախատեսված տիեզերական սարքեր՝ վայրէջքային մոդուլ (lander) և մոլորակագնաց (rover):  ՆԱՍԱ-ն աշխատում է Թայվանի Չունգ-Շան  գիտության և տեխնոլոգիաների ինստիտուտի հետ համատեղ, որպեսզի կառուցի lander, որը պլանավորված է գործարկել 2020-ականների սկզբում: Նպատակն է ապացուցել, որ Լուսնի վրա ևս կարող են հայթաթվել օգտակար հանածոներ:

Միսիան կոչվում է Resource Prospector: Հիմնական գործողությունները կատարվելու են փոքր մոլորակագնաց սարքի միջոցով՝ ստեղծված օգտակար հանածոներ գտնելու նպատակով Լուսնի մակերեսը սկանավորելու համար: Այնպիսի տիեզերական միսիաներից, ինչպիսիք են՝ Lunar Crater Observation-ը, Sensing Satellite և Lunar Reconnaissance Orbiter-ը, հայտնի է, որ Լուսնի վրա կան ջրի և գազի հսկայական պաշարներ:

Տեխնոլոգիաների զարգացման ներկայիս մակարդակի պարագայում տիեզերական միսիաների համար անհրաժեշտ բոլոր ռեսուրսները պետք է տարվեն Երկրից: Ինչը նշանակում է՝ ավելի շատ վառելիք, ավելի շատ գումար և ավելի քիչ հնարավորություն սխալների համար: Լուսնի վրա առկա թթվածնի, ջրածնի և սառած ջրի պաշարները կարող են կիրառվել վառելիքի արտադրության, շնչելու համար պիտանի օդի կամ խմելու ջրի արտադրության համար: Իսկ դեպի Մարս ուղևորվելիս Լուսնի վրա լիցքավորման կանգառ կատարելը ճանապարհորդությունն ավելի ապահով և մատչելի  կդարձնի:

Երբ Resource Prospector մոլորակագնաց սարքը հասնի Լուսնին, այն կկիրառի սենսորներ ջուր, ջրածին և այլ գազեր հայտնաբերելու համար: Գտնելով պոտենցիալ ունեցող տարածք՝ սարքը կփորի այն մեկ մետրի չափով և կվերցնի նմուշ, որն այնուհետև կտաքացվի, որպեսզի պարզ դառնա դրա բաղադրությունը:

Եթե հաջողվի լուսնային մակերեսից հայթայթել բավականաչափ օգտակար հանածոներ, ապա մարդկությունը կստանա տիեզերքում ռեսուրսների պաշարներ ստեղծելու և օգտագործելու հնարավորություն:

Share.