Շվեյցարիայում սկսել են փորձարկվել ինքնակառավարվող ավտոբուսներ

0


Շվեյցարական Սիոն քաղաքի փողոցներում այժմ կարելի է հանդիպել էլեկտրական ինքնակառավարվող ավտոբուսների: Լոզանի տեխնոլոգիաների շվեյցարական դաշնային ինստիտուտի (EPFL) և Mobility Lab Sion-Valais-ի համագործակցությամբ ստեղծված փոխադրամիջոցներն օգտագործում են սմարթ ալգորիթմ անհրաժեշտ ուղղությունով ընթանալու համար:

Մինչև Սիոն քաղաք հասնելը ավտոբուսները մի քանի կանգառ ունեն: Քաղաքացիները կարող են անվճար երթևեկել, չնայած որ բազմազբաղ մարդկանց համար, 20 կմ/ժ արագությունը կարող է անտանելի դանդաղ թվալ:

Ինքնակառավարվող ավտոբուսների երթևեկության պատասխանատուն է Շվեյցարիայի խոշորագույն ավտոբուսային ընկերություն PostBus-ը: Երթևեկության ընթացքին հետևում են մեկական մենեջեր և ուղեկցող, ովքեր հսկում են, որ ամեն ինչ ճիշտ աշխատի և բոլոր ուղևորները զբաղեցնեն իրենց տեղերը:

Եթե նախագիծն ունենա հաջողություն, ապա EPFL-ը պլանավորում է նոր մասնաճյուղեր հիմնել նաև այլ քաղաքներում: Պետք է նշել, որ անվտանգության նկատառումներով մինչ փորձարկումների թույլատրումը Շվեյցարիայի տեղական իշխանությունների կողմից խորը ուսումնասիրություններ են կատարվել, և այլ քաղաքների համար, հավանաբար, ևս կլինի թույլատրության անհրաժեշտություն:

Սկսած ինքնակառավարվող ավտոբուսների մասին առաջին տեղեկությունների ի հայտ գալուց, դրանք բազմաթիվ բարելավումների են ենթարկվել: Այժմ փոխադրամիջոցները հագեցած են օդափոխանակության համակարգով, հաշմանդամների համար հատուկ հարմարություններով և երկրորդ մարտկոցով:

Շվեյցարիան ունի բավականին նոսր բնակչություն, ինչն էլ այն շատ հարմար վայր է դարձնում ինքնակառավարվող մեքենաների փորձարկման տեսանկյունից:

Չնայած, որ ավտոմատացված տեխնոլոգիաների հասարակական տրանսպորտ ներմուծելու հարցում Շվեյցարիան առաջինն է, սակայն կան նաև այլ հետաքրքիր նախաձեռնություններ ևս: Օրինակ՝ Եվրոպայի խոշորագույն երկաթուղային ընկերություն Deutsche Bahn-ը ցանկանում է, օգտագործել ինքնավար մեքենաները մինչև ձեր ճանապարհորդության «վերջնական մղոնը» իսկ բրիտանական RDM Group կազմակերպությունը հայտարարել է ինքնակառավարվող փոքր չափի մեքենաների նոր շարքի մասին՝ նախատեսված առևտրի կենտրոններում և այգիներում վարելու համար:

Share.